Útgáfuteiti

Mánudagur 23. október 2017

Föstudaginn 27. október verður haldið útgáfuteiti í Eymundsson, Austurstræti, frá klukkan 17 til 19, vegna útgáfu bókarinnar, Vargöld á vígaslóð, eftir metsöluhöfundinn Magnús Þór Hafsteinsson. Þar verður bókin seld á tilboðsverði og síðasta bók höfundarins, Tarfurinn frá Skalpaflóa, fylgir ókeypis með á meðan birgðir endast (70 stk.). Láttu sjá þig!

Efnisflokkun: Fréttir og tilkynningar

Anna – Eins og ég er

Fimmtudagur 19. október 2017

Anna og Gurrí      Þessi bók, ANNA – EINS OG ÉG ER var að detta í hús í dag. Þetta er ævisaga Önnu K. Kristjánsdóttur, skrifuð af Guðríði Haraldsdóttur, sem eru hér að taka á móti fyrstu eintökunum af þessari mögnuðu bók sem vafalaust margir eiga eftir að lesa. Bókin verður send í búðir á mánudaginn.

Efnisflokkun: Fréttir og tilkynningar

Útgáfuteiti

Fimmtudagur 8. júní 2017

Klukkan 11 á sjómannadaginn verður útgáfuteiti vegna útkomu bókarinnar HÍF OPP! Gamansögur af íslenskum sjómönnum, eftir Guðjón Inga Eiríksson. Það verður haldið í Sjóminjasafninu við Grandagarð og þangað mæta nokkrir snillingar og segja sögur, þ.e. Ragnar Ingi Aðalsteinsson, Magni Kristjánsson, Jón Berg Halldórsson og Ingvar Viktorsson. „Teitsstjóri“ verður Gunnar Kr. Sigurjónsson og auðvitað eru allir velkomnir.

Efnisflokkun: Fréttir og tilkynningar

Örnólfur látinn

Mánudagur 6. febrúar 2017

Örnólfur Thorlacius, fyrrum rektor MH og fræðimaður í þess orðs víðasta skilningi, lést í gær á áttugasta og sjötta aldursári. Leiðir hans og Bókaútgáfunnar Hóla lágu fyrst saman fyrir liðlega áratug þegar útgáfan gaf út afmælisrit hans, Örnólfsbók. Síðar skrifaði hann tvær merkar bækur sem Hólar gáfu einnig út, Kafbátasagan og Flugsaga.  Báðar eru þær afar vel unnar, eins og höfundarins var von og vísa; afskaplega fræðandi en líka skemmtilegar, enda átti hann auðvelt með að koma orðum að því sem hann tók sér fyrir hendur, svo allt varð ljóslifandi fyrir þeim sem las.

Örnólfur var mikill húmoristi og óspar á að deila gamansögum með öðrum. Í einni gamansagnabók Hóla eru einmitt skopsögur ættaðar frá honum, en margar fleiri urðu sögurnar sem hann sagði mér og hver annarri betri.

Að leiðarlokum vil ég þakka Örnólfi fyrir gott og ánægjulegt samstarf.

Guðjón Ingi Eiríksson

Efnisflokkun: Fréttir og tilkynningar

Jólakveðja

Fimmtudagur 22. desember 2016

Bókaútgáfan Hólar óskar öllum landsmönnum gleðilegra jóla og þakkar stórgóðar viðtökur á þeim bókum sem hún gaf út á árinu. Munum eftir þeim sem minna eiga, það gerir öllum gott að lesa kaflann um Gústa guðsmann, sem sagt er frá í hinni frábæru endurminningabók séra Vigfúsar Þórs Árnasonar, Vilji er allt sem þarf, en hann vann þrekvirki í þágu lítilmagnans og lesningin um það er svo sannarlega mannbætandi.

Efnisflokkun: Fréttir og tilkynningar

Einstakt barnabókatilboð!

Laugardagur 3. desember 2016

Þú kaupir LEYNILÍF GÆLUDÝRA á kr. 3.280- og SKÓSVEINARNIR fylgja frítt með. Sendingargjald innifalið í verðinu. Þessar tvær bækur byggja á þekktum og vinsælum kvikmyndum og eru allt í senn; skemmtilegar, þroskandi og reyna á athyglina. Er þetta ekki eitthvað fyrir barnið þitt, barnabarnið, frænkuna eða frændann?
Þeir sem vilja þiggja tilboðið sendi póst á holar@holabok.is – þá verður sent til baka bankanúmer Bókaútgáfunnar Hóla og kennitala og þegar búið er að leggja inn á það (og senda staðfestingu á holar@holabok.is) verða bækurnar sendar.

Efnisflokkun: Fréttir og tilkynningar

Frábær ritdómur!

Laugardagur 3. desember 2016

Eðalbókin, Skagfirskar skemmtisögur 5, fékk frábæran ritdómi í hjá Reyni Traustasyni í Stundinni. Fyrirsögnin var: „Drepfyndnar gamansögur“. Síðan segir m.a. um bókina: „Það leiðist engum lesturinn, hvar svo sem ræturnar liggja. Lesandinn engist á köflum sundur og saman af hlátri.“ Þá er bara að vona að sem flestir geti gripið í bókina.

Efnisflokkun: Fréttir og tilkynningar

Útgáfuteiti og Siglfirðingakvöld

Laugardagur 26. nóvember 2016

Þann 24. nóvember síðastliðinn var haldið útgáfuteiti vegna bókarinnar Vilji er allt sem þarf – endurminningar séra Vigfúsar Þórs Árnasonar. Fór það fram í Safnaðarheimili Grafarvogskirkju og mættu þangað um 100 manns. Sama dag, eða öllu heldur þá um kvöldið, var haldið Siglfirðingakvöld og þar sagði séra Vigfús Þór frá bókinni „og fór á kostum“ eins og einn viðstaddra sagði. Fleiri bækur voru þar einnig kynntar en myndir frá „kvöldinu“ má sjá á þessari slóð: http://www.siglfirdingur.is/myndir-fra-siglfirdingakvoldi/

Efnisflokkun: Fréttir og tilkynningar, Grafarvogur, Siglufjörður

Útgáfuteiti þ. 24. nóvember 2016

Laugardagur 19. nóvember 2016

Nýlega kom út bókin VILJI ER ALLT SEM ÞARF – endurminningar séra Vigfúsar Þórs Árnasonar, sem Ragnar Ingi Aðalsteinsson hefur skráð. Af því tilefni verður haldið útgáfuteiti í Safnaðarheimili Grafarvogskirkju fimmtudaginn 24. nóvember kl. 17:00. Þar verður lesið úr bókinni og hún árituð, en einnig verður boðið upp á glæsileg tónlistaratriði: Kór Grafarvogskirkju og Vox Populi munu syngja. Einsöngvarar eru „óperudrottningin“ Þóra Einarsdóttir og Gissur Páll Gissurarson og kórstjórar þeir Hákon Leifsson og Hilmar Örn Agnarsson.
Ljúffengar veitingar verða í boði. Allir eru velkomnir.

Bókaútgáfan Hólar og ritnefnd bókarinnar

Efnisflokkun: Fréttir og tilkynningar

Gústi guðsmaður

Mánudagur 14. nóvember 2016

Það er vert að vekja athygli á því að í endurminningum séra Vigfúsar Þórs Árnasonar, Vilji er allt sem þarf, er fjallað í þó nokkuð löngu máli um Siglfirðinginn Gústa guðsmann. Hann var einsetukarl og sjómaður, veiddi fisk á báti sínum sem hann réri einn á og gaf andvirði aflans til bágstaddra út um allan heim. Hann var því ekki að skara eld að eigin köku – eins og er svo algengt meðal fólks í dag – heldur lét þá njóta sem minna máttu sín og eiga margir honum mikið að þakka.
Umrædd frásögn er snilldarvel skrifuð, eins og reyndar öll bókin, en því miður hefur Gústi guðsmaður legið óbættur hjá garði fram að þessu.
Svo má bæta því við að sennilega hafa fáir talað í eigin jarðarför – en það gerði Gústi guðsmaður og „hrukku margir kirkjugesta við þegar hann hóf upp raust sína“.

Efnisflokkun: Fréttir og tilkynningar, Grafarvogur, Reykjavík, Siglufjörður
Eldra Nýrra

Bókaútgáfan Hólar

Hagasel 14, 109 Reykjavík
Sími: 587 2619
Fax: 587 1180
Netfang: holar (hja) holabok.is