Instagram

Sunnudagur 3. október 2021

Bókaútgáfan Hólar er mætt á Instagram. Þú finnur hana undir bokautgafan_holar. Endilega skelltu í „add“ og fylgstu með skemmtilegum innslögum!

Efnisflokkun: Fréttir og tilkynningar

Papa Jazz allur

Sunnudagur 18. apríl 2021

Um miðjan þennan mánuð lést Guðmundur Steingrimsson – Papa Jazz. Hann var afar snjall trommuleikari og einn af brautryðjendum djassins hér á landi; lék með fjölda hljómsveita og kenndi ýmsum þá list sem vandaður trommuleikur er.

Árið 2009 kom út hjá Bókaútgáfunni Hólum ævisaga Guðmundar og ber hún einfaldlega heitið Papa Jazz. Það var Árni Matthíasson sem skráði og má fullyrða hér og nú að samvinna þeirra félaga hafi orðið til þess að margvíslegur fróðleikur um tónlistarlífið á Íslandi varðveitist um ókomin ár og þá ekki síst það sem snýr að jazzinum.

Undirritaður kynntist Guðmundi vel á þessum árum og ræddum við um heima og geima, meira að segja um knattspyrnu, en Papa Jazz var stuðningsmaður Leeds og fylgdist ágætlega með boltasparkinu. Þess utan var hann mikill sögubrunnur um menn og málefni og var virkilega gaman að hlusta á hann segja frá. Hann kunni óteljandi sögur, fæstar máttu auðvitað fara eitthvað lengra, en hann sagði þær og aðrar einnig af slíkri snilld að unun var af.

Blessuð sé minning Papa Jazz.

Guðjón Ingi Eiríksson.

Efnisflokkun: Fréttir og tilkynningar

Laugardagur 10. apríl 2021

Svenni látinn

Í dag er til moldar borinn gamall nágranni minn frá Eskifirði, Sveinn Sigurbjarnarson, rútubílstjóri, ferðafrömuður, ævintýramaður og ég veit ekki hvað og hvað. Hann var einstakur maður á margan hátt og því þótti mér mikill fengur í því þegar hann féllst á það að leyfa mér að gefa út ævisögu sína. Það tók samt nokkur samtöl, en bókin heitir ÞAÐ REDDAST, kom út árið 2010 og er skráð af Ingu Rósu Þórðardóttur, sem því miður kvaddi þennan heim nokkrum árum síðar eftir baráttu við sama vágest og Svenni þurfti að lúta í gras fyrir, bölvað krabbameinið.

Skemmst er frá því að segja að bókin rokseldist og þá ekki síst á Austurlandi þar sem Svenni var gríðarlega mikils metinn og ekki af ástæðulausu. Seinna sagði hann mér að einn af kunningjum hans hefði fengið átta eintök af henni í jólagjöf og annar þrjú eintök. Hinn síðarnefndi hefði lesið þau öll og fundist það síðasta best!

Ég sendi öllum ættingjum Sveins Sigurbjarnarsonar samúðarkveðjur um leið og ég þakka honum fyrir fjölmargar rútuferðir í kringum íþróttir og skóla – svo og ekki síst vegna bókarinnar sem mun vafalítið halda nafni hans lengi á lofti.

Guðjón Ingi Eiríksson

Efnisflokkun: Fréttir og tilkynningar

Ljóðasafn Hjálmars Freysteinssonar

Fimmtudagur 4. febrúar 2021

Í maí næstkomandi verður gefið út úrval ljóða og lausavísna eftir Hjálmar Freysteinsson. Hann fæddist 18. maí  1943 og lést 6. febrúar 2020 og starfaði sem heimilislæknir, lengst af á Akureyri. Hjálmar var landsþekktur fyrir snjallar vísur. Hann var allra manna fundvísastur á þær hliðar á málum sem vöktu kátínu, gat alltaf séð það spaugilega, aldrei rætinn eða klúr, bara skemmtilegur.

Það er Bókaútgáfan Hólar sem gefa mun bókina út, en Ragnar Ingi Aðalsteinsson og Höskuldur Þráinsson munu búa hana til prentunar. Í bókinni, sem áætlað er að verði um 200 blaðsíður, verður Tabula Memorialis og þar verða nöfn þeirra sem vilja votta lækninum og hagyrðingnum, Hjálmari Freysteinssyni, virðingu sína, skráð (nema viðkomandi kjósi ekki nafnbirtingu), en forkaupsverð hennar verður kr. 6.980- (innifalið er bæði sendingargjald og virðisaukaskattur). Áhugasamir kaupendur eru beðnir að senda nafn sitt, heimilisfang og kennitölu á netfangið holar@holabok.is (eða hringja í síma 692-8508 eftir klukkan 16 á daginn) og verða þá greiðslupplýsingar sendar til baka.

Það verður enginn svikinn af þessari bók, svo mikið er víst.

Efnisflokkun: Fréttir og tilkynningar

Saga Ljósmæðrafélags Íslands og ljósmæðratal

Fimmtudagur 7. janúar 2021

Gleðilegt ár!

Fyrsta bók ársins hjá Bókaútgáfunni Hólum er komin út. Um er að ræða bókina Ljósmæðrafélag Íslands í 100 ár, sem bæði er saga þess og ljósmæðratal frá 1984-2019, en áður var komið út stéttartal ljósmæðra fyrir árin fram að 1983.

Efnisflokkun: Fréttir og tilkynningar

Jólakveðja

Sunnudagur 20. desember 2020

Ágætu Íslendingar! Bókaútgáfan Hólar sendir landsmönnum öllum hugheilar jóla- og nýjárskveðjur og þakkar fyrir samstarfið – og góðar viðtökur Hólabóka – á árinu sem er að líða. Munum að ganga hægt um gleðinnar dyr að þessu sinni því nú er það „jákvætt að vera neikvæður!“. Lifið heil!

Efnisflokkun: Fréttir og tilkynningar

Jóla-Hóla-bækurnar 2020

Mánudagur 16. nóvember 2020

Jæja, þá eru allar Hólabækur ársins komnar út og fást í öllum bókaverslunum og víða í stórmörkuðum. Einnig má alltaf panta þær hjá bókaútgáfunni sjálfri í netfanginu holar@holabok.is

Efnisflokkun: Fréttir og tilkynningar

Veganúar er hafinn

Fimmtudagur 2. janúar 2020

Nú þegar nýtt ár er gengið í garð höfum við flest sett okkur nýjar stefnur og markmið sem munu hjálpa okkur við að halda ótrauð inn í nýjan áratug. Fyrir mörg okkar er erfitt að halda í við þau enda eru væntingarnar oftar en ekki úr takti við raunveruleikann, en Bókaútgáfan Hólar fann hinn gullna meðalveg með alheimsútgáfu á bókinni, VEGAN-ELDHÚS GRÆNKERANS, eftir þær Rose Glover og Laura Nickoll.

Nú í janúar, mánuðinum sem er orðinn betur þekktur undir heitinu Veganúar, er fátt betra en að ná sér í eintak af umræddri bók og kynna sér grænkera-lífstílinn og hvað hann getur gert til þess að efla bæði heilsu og hamingju.

Í bókinni VEGAN-ELDHÚS GRÆNKERANS er farið yfir þau lífsnauðsynlegu efni sem er að finna í jurtaríkinu sem eiga ávallt að vera partur af mataræðinu og sömuleiðis er kynnt fyrir okkur hvaða áhrif þau hafa. Einnig má þar finna girnilegar uppskriftir og sniðug fróðleikskorn sem allir geta nýtt sér í matargerð sinni.

 

 

 

 

Efnisflokkun: Fréttir og tilkynningar

Gleðileg jól!

Laugardagur 21. desember 2019

Bókaútgáfan Hólar óskar öllum landsmönnum gleðilegra jóla og spillingalauss komandi árs! Kærar þakkir fyrir frábærar viðtökur á bókum okkar á árinu sem senn er að líða. Vonandi njótið þið þeirra um hátíðarnar og lengi þar á eftir.

Efnisflokkun: Fréttir og tilkynningar

Sunnudagur 17. nóvember 2019

Aug.Erna 2019

Efnisflokkun: Fréttir og tilkynningar
Eldra

Bókaútgáfan Hólar

Hagasel 14, 109 Reykjavík
Sími: 587 2619
Fax: 587 1180
Netfang: holar (hja) holabok.is